مجموعة پيتش پيرفيكت من تو فيسد 🍑 | Peach Perfect Collection By Toofaced.

من أول ما نزل الكوليكشن دا قبل كم سنة و أنا نفسي اجربه، و قبل سنة و نص تقريبًا سيفورا الأمريكي كانوا منزلين المجموعة دي (فاونديشن - لوس پاودر - پرايمر - الماسكرا المشهورة حقتهم Better Than Love) في بوكس واحد و بسعر جدًا مغري 😂 كان بـ٤٥ دولار يعني تقريبًا ١٧٠ ريال 🥰

.

المجموعة بالكامل matte و كلها مطفية و مافيها أي لمعة

ابدأ بالپرايمر اللي اعتبره كارثة الصراحة، المفروض أنه مات و يناسب البشرات الدهنية و يخلي البشرة مطفية طوال اليوم. احب اقولكم إنه أسوأ منتج جربته في حياتي 😖

بمجرد ما احطه على وجهي و أحط الفاونديشن فوقه ألاقيه يتحرك من مكانه و يتقشر و يخرب كل شي 😖 حاولت قد ما اقدر إني اطبطب الفاونديشن فوقه بشويش من غير ما أسحب يدي عليه عشان يثبت لكن برضو ما فاد للأسف و أضطر أعيد الميك من أول و جديد 😕

بالنسبة للفاونديشن عندي علاقة حب و كره معاه 😕

التغطية حقته متوسطة لكاملة، على حسب كم طبقة تحطوا بس أنا حسيت إنه تغطيته مو مرة قوية و ممكن ما يناسب الناس اللي يعانوا من الحبوب و اثارها. يتوزع على البشرة بشكل مرتب، يجلس على الوجه طول اليوم لو اتثبت بـلوس پاودر.

توفيسد سوقوه على إنه (comfort matte) (مطفي مريح) يعني إنه مو مات مرة لدرجة يبين البشرة ناشفة و مافيها أي نوع من الترطيب. الفاونديشن نوعه مو مرة مطفي ولا هو مرة ديوي. جاي في النص و فعلًا ملمسه على الوجه خفيف و مريح ما تحسوا إنه في طبقة تقيلة .. بشرتي مختلطة، دهنية في التي زون و باقي الوجه جاف. و ما كان في أي مشاكل كونه يعتبر فاونديشن مطفي. .

و أخيرًا اللوس پاودر.

لمن اشتريتها ما كان في منها غير لون واحد. اللي عندي لونها مايل على الپينك او (خوخي 🍑😂) بس على البشرة ما يبان أي لون (شفافة) ما تفتح تحت العين زي اللوس باودرز اللي لونها يميل للأصفر، مرة حبيتها تنعم الوجه و تخفي المسامات و تثبت الفاونديشن و الكونسيلر مزبوط 👍🏽

الآن وفروا منها عدة درجات ..

المجموعة كلها تحتوي على عطور بريحة الخوخ 🥰❤️، ممكن ما يناسب البشرات الحساسة أو اللي تتحسس من المنتجات المعطرة ..

@Toofaced.