مقارنة بين إسفنجات الدمج | Beauty Sponges Comparison

السلام عليكم و رحمة الله و بركاته ..

ينفع اقول انه اسفنجات الدمج من اعظم الاختراعات اللي حصلت في عالم الميكب و اغلبنا ما يستغني عنهم .. فحبيت في هذا البلوق اني اعمل مقارنة بين ٣ اسفنجات جربتهم من ٣ شركات مختلفة.

وراح أقيمهم من الأفضل للأسوأ:

طبعًا من غير أي مناقشة البيوتي بليندر حتكون في المركز الأول 🥰

حقيقي على قد ما جربت اسفنجات لكن لحد الآن ما لقيت وحدة أفضل أو حتى في مستوى البيوتي بليندر، احب إنها مرة لينة و خفيفة جدًا و تمتص الفاونديشن بنسبة كبيرة عشان ما يكون تقيل و مكتل على البشرة، و بكذا تقدروا تتحكموا في درجة تغطية الفاونديشن، تدمج الميكب الكريمي مرة كويس، و تنفع في الأماكن الصغيرة و

الضيقة زي تحت العيون و مدمع العين.

.

الجهة المدببة مناسبة لدمج الكونسيلر أو اللوس پاودر تحت العيون و أطراف الأنف. الطرف المحدب لكامل الوجه.

سهلة جدًا في التنظيف و بسبب ليونتها الصابون يدخل للأعماق و ينظفها من قلب 😂 على إنه سعرها شوية مرتفع لكن والله تستاهل كل ريال، و تعيش معايا فترة طويلة (طبعا مع الإهتمام و التنظيف و التعقيم الدائم) من غير ما يخرب شكلها.

(سعرها ٨٠ ريال) موجودة في سيفورا

.@sephoramiddleeast.

بعدها تجي اسفنجة ريل تيكنيكس:

أول مرة جربتها كانت قبل ٥ سنوات و كان جدًا لينة و خفيفة و لطيفة و حسيتها بنفس مستوى البيوتي بليندر، لكن مؤخرًا لاحظت أنها اتغيرت عن زمان، صارت قاسية و لمن ابللها بالموية تصير تقيلة و ما تمتص الفاونديشن كويس، وهذا شي مناسب لو تحبوا إنه تغطية الفاونديشن تكون عالية، الطرف المدبب مناسب للأماكن الصغيرة برضه، و الطرف المسطح يوزع الفاونديشن بشكل مرتب على باقي الوجه، و من ناحية التنظيف فهي جدًا صعبة و متعبة، الفاونديشن يطبع فيها و صعب يخرج منها، شكلها ينعدم تخرب بسرعة مدري ليش 😖

(سعرها تقريبًا ٤٥ ريال) موجودة في آيهيرب أو صيدلية وايتس.

.@whites_me@iherb.

و أخيرًا اسفنجة جونو المخملية/المايكروفايبر:

. على قد ما كنت متحمسة أجربها و سمعت ريفيوز حلوة عنها لكن أبدًا أبدًا ما حبيتها، ما تمتص الفاونديشن أبدًا و مع إني ابللها بالموية مزبوط لكن احسها ناشفة، تدمج الفاونديشن كويس على الوجه لكن ما تمتصه أبدًا ف يطلع شكله متكتل و مو طبيعي على البشرة، برضه صعبة في التنظيف و يطبع فيها الفاونديشن. (سعرها تقريبًا ٢٣ ريال) أخدتها من موقع بيوتي ليش

.@beautylish

للأمانة قريب أشتريتها و ما جربتها إلا ٣ مرات، لكن في كل الثلاث مرات ما حبيتها، لكن لسة راح اعطيها فرصة و اجربها كذا مرة لعل و عسى احبها 🤨